თბილისის საკრებულოში სატრანსპორტო საკითხთა კომისიის სხდომა გაიმართა. 

სხდომას, რომელსაც  კომისიის თავმჯდომარე შალვა ოგბაიძე უძღვებოდა, კომისიის წევრებთან ერთად შპს თბილისის სატრანსპორტო კომპანიის გენერალური დირექტორი გიორგი შარკოვი და   სსიპ „ქალაქ თბილისის   მუნიციპალიტეტის ტრანსპორტისა და ურბანული განვითარების სააგენტოს“ უფროსის მოადგილე დავით ჯაიანი ესწრებოდნენ.

დავით ჯაიანმა კომისიის წევრებს საქართველოსა და აზიის ინფრასტრუქტურის საინვესტიციო ბანკს (AIIB) შორის 2025 წლის 23 იანვარს გაფორმებული სასესხო შეთანხმების საფუძველზე საქართველოს ფინანსთა სამინისტროს, დედაქალაქის  მუნიციპალიტეტსა და შპს „თბილისის სატრანსპორტო კომპანიას“ შორის ქვესასესხო ხელშეკრულების გაფორმებაზე ქალაქ თბილისის მუნიციპალიტეტის საკრებულოდან თანხმობის მიღების თაობაზე“ საკრებულოს განკარგულების პროექტი წარმოუდგინა.

როგორც დავით ჯაიანმა აღნიშნა, პროექტის მიზანი ახალი მოძრავი შემადგენლობის შესყიდვის გზით, თბილისის მეტროს სისტემის ეფექტიანობის, სანდოობის, უსაფრთხოებისა და მდგრადობის გაზრდაა და ის სამი ნაწილისგან შედგება. 

პირველი, ეს არის მოძრავი შემადგენლობის შეძენა. მეორე - შესაძლებლობების გაზრდა და ინსტიტუციონალური გაძლიერება და მესამე, ტექნიკურ-ეკონომიკური შესწავლა და წინამოსამზადებელი დიზაინი დეპოსა და გვირაბის რეაბილიტაციისთვის.

წარმოდგენილი პროექტის საფუძველზე, ფინანსთა სამინისტრო, სასესხო შეთანხმების პირობების გათვალისწინებით, თბილისის მუნიციპალიტეტს გადასცემს სასესხო შეთანხმებით საქართველოსთვის გათვალისწინებულ თანხას 125,000,000 (ასოცდახუთი მილიონი) ევროს, სესხის სახით სასესხო შეთანხმებითა და საპროექტო ხელშეკრულებით გათვალისწინებული ღონისძიებების დასაფინანსებლად.