თბილისის საკრებულოს ისინის რაიონის მაჟორიტარი დეპუტატი კახა ლაბუჩიძე დედაქალაქის მერთან, კახა კალაძესთან და  თბილისის მერის მოადგილესთან, ირაკლი ბედნელიანთან, ერთად ისინის რაიონში  აწყურის ქუჩის  სარეაბილიტაციო სამუშაობს ადგილზე გაეცნო. 

სარეაბილიტაციო სამუშაოები ლეხ კაჩინსკის ქუჩიდან ვაჟა ჩაჩავას ქუჩამდე არსებულ საგზაო მონაკვეთში განხორციელდება.   ამ ეტაპზე  წყალმომარაგების, წყალარინების და გაზმომარაგების ქსელების განახლება მიმდინარეობს, რომლის დასრულების შედეგად თბილისის მერიის ინფრასტრუქტურის განვითარების საქალაქო სამსახური საგზაო სამუშაოებს დაიწყებს.

როგორც კახა ლაბუჩიძემ აღნიშნა, ისინის რაიონში კიდევ ერთი მნიშვნელოვანი პროექტი განხორციელდება. მისი თქმით,  სრულად განახლდება  მიწისქვეშა კომუნიკაციები, რის შემდეგაც  სამუშაობში ჩაერთვება ინფრასტრუქტურის განვითარების საქალაქო სამსახური,  რომელიც მოაწყობს  სანიაღვრე ქსელს. ასევე, ელექტროსადენები განთავსდება მიწისქვეშ, დამონტაჟდება განათების ბოძები LED სანათებით, მოეწყობა ტროტუარი და ტერიტორია ადაპტირდება შშმ პირთათვის.

გარდა ამისა, პროექტის ფარგლებში, გზის სავალ ნაწილზე დაიგება ასფალტი, დაიხაზება ზებრა გადასასვლელები და მოეწყობა საპარკინგე სივრცეები. აღსანიშნავია, რომ  სამუშაობის  დასრულება მიმდინარე წლის ივლისში იგეგმება.