თბილისის საკრებულოში ჯანმრთელობის დაცვის და სოციალურ საკითხთა კომისია გაიმართა, რომელსაც კომისიის თავმჯდომარე ზურაბ ჩიკვილაძე უძღვებოდა. 

სხდომაზე „თბილისის მუნიციპალიტეტის ბიუჯეტით გათვალისწინებული ჯანმრთელობის დაცვის ქვეპროგრამების განხორციელების წესების დამტკიცების შესახებ“  საკრებულოს 2024 წლის 27 დეკემბრის № 50-99 დადგენილებაში ცვლილების შესახებ იმსჯელეს, რომელიც ქვეპროგრამის ფარგლებში, თვეში დასაფინანსებელი ბენეფიციარების რაოდენობის ზრდას ეხება. 

როგორც კომისიის სხდომაზე აღინიშნა, აუტიზმის სპექტრის დარღვევის მქონე ბავშვთა აბილიტაციის პროგრამაში ჩართვის მოთხოვნა მუდმივად იზრდება, თბილისის მუნიციპალიტეტისთვის კი მნიშვნელოვანია, რომ ყველა მსურველმა შეძლოს ქვეპროგრამით გათვალისწინებული მომსახურების მიღება.

წარმოდგენილი პროექტით, პროგრამით მოსარგებლეთა ლიმიტი  300 ერთეულით იზრდება, შესაბამისად, ქვეპროგრამის ფარგლებში დაფინანსებას 2100 ბენეფიციარის ნაცვლად  -  2400 ბენეფიციარი მიიღებს. აღნიშნული საკითხი კომისიის წევრებს მერიის ჯანდაცვისა და სოციალური მომსახურების საქალაქო სამსახურის წარმომადგენელმა თამარ გოგიტიძემ  გააცნო. 

დღესვე კომისიის სხდომაზე „თბილისის მუნიციპალიტეტში პერსონალური ასისტენტის მომსახურებით უზრუნველყოფის ქვეპროგრამის განხორციელების წესში“ ცვლილებებზეც იმსჯელეს. წარმოდგენილი ცვლილებების მიზანი, წესში მოცემულ ტერმინთა სრულყოფილად ჩამოყალიბება, ქვეპროგრამის განმახორციელებლის მიერ კონტროლის განხორციელების ფარგლებისა და საანგარიშგებო დოკუმენტაციის წარმოდგენის ვადის დაზუსტებაა. 

კომისიის სხდომაზე წარმოდგენილ საკითხებს საკრებულოს უახლოეს სხდომაზე განსახილველად დადებითი რეკომენდაცია მიეცა.