30 მარტი 2025 თბილისის საკრებულოს ჯანმრთელობის დაცვის და სოციალურ საკითხთა კომისიის თავმჯდომარე ზურაბ ჩიკვილაძე ექიმების საერთაშორისო დღესთან დაკავშირებით მრავალპროფილურ სამედიცინო ცენტრს, „პინეო სამედიცინო ეკოსისტემას“, ეწვია.
კომისიის თავმჯდომარეს პერინატალური ცენტრის ხელმძღვანელმა ზაზა სინაურიძემ და კლინიკურმა ხელმძღვანელმა გია თომაძემ უმასპინძლეს.
ზურაბ ჩიკვილაძემ სამედიცინო ცენტრი დაათვალიერა, რომლის ინფრასტრუქტურა თანამედროვე სტანდარტებსაა მორგებული, აღჭურვილია ახალი სამედიცინო აპარატურით და მაღალი კვალიფიკაციის მქონე ექიმებით არის დაკომპლექტებული.
შეხვედრისას მხარეებმა მოსახლეობაზე მორგებული ჯანდაცვის სისტემის გამართულად მუშაობის მნიშვნელობაზე ისაუბრეს და ხაზი გაუსვეს, რომ აღნიშნული საკითხი ქვეყნის განვითარების მნიშვნელოვანი პირობაა.
კლინიკაში სტუმრობისას კომისიის თავმჯდომარე სამედიცინო პერსონალს შეხვდა და მათ ექიმების საერთაშორისო დღე მიულოცა.
„დღევანდელი დღე გვაძლევს გამორჩეულ შესაძლებლობას, რომ გამოვხატოთ მადლიერება და პატივისცემა ექიმების მიმართ, მათი თავდაუზოგავი შრომის მიმართ, ეს არიან ადამიანები, რომლებიც ყოველდღიურად ზრუნავენ ჩვენზე. მათი ღვაწლი ფასდაუდებელია“, - განაცხადა ზურაბ ჩიკვილაძემ.
