21 სექტემბერი 2022 თბილისის საკრებულოს ფრაქცია “თბილისი საქართველოსთვის" თავმჯდომარის მოადგილემ გიორგი შარაშიძემ დედაქალაქში გადატვირთულ მოძრაობასა და საზოგადოებრივი ტრანსპორტის მუშაობასთან დაკავშირებით ბრიფინგი გამართა.
როგორც საკრებულოს დეპუტატმა განაცხადა, ბოლო პერიოდში საზოგადოებრივი ტრანსპორტი გაუმართავად მუშაობს და მოქალაქეებს დაუსრულებელ საცობებში დგომა საათობით უწევთ. გიორგი შარაშიძის თქმით, თბილისელები საზოგადოებრივი ტრანსპორტით მგზავრობისას გაზრდილ ტარიფებს იხდიან, მაგრამ სათანადო ხარისხის მომსახურებას მაინც ვერ იღებენ. როგორც გიორგი შარაშიძემ განაცხადა, ფრაქცია „თბილისი საქართველოსთვის“ რამდენიმე ინიციატივით გამოდის.
მათ შორის, ფრაქცია ითხოვს, რომ სატრანსპორტო რეფორმის დასრულებამდე საზოგადოებრივი ტრანსპორტით სარგებლობა თბილისელებისთვის უფასო გახდეს. აღნიშნული საკითხის განსახილველად, ჩაინიშნოს საკრებულოს რიგგარეშე სხდომა, რომელზეც დედაქალაქის მერი სატრანსპორტო კოლაფსიდან გამოსვლის კონკრეტულ სამოქმედო გეგმაზე ისაუბრებს; დონორებთან თანამშრომლობით, დაჩქარდეს თბილისის მეტროს გაფართოების პროექტზე მუშაობა და დაიწყოს ახალი გზების მშენებლობა; ინფრასტრუქტურული პროექტების დაგეგმვის პროცესში უზრუნველყოფილი იყოს თბილისელების აქტიური ჩართულობა.
„თბილისში შექმნილი მდგომარეობა კიდევ ერთხელ ადასტურებს დედაქალაქის მერიის მენეჯმენტის არაეფექტიანობას, რაც ნიშნავს საჭიროზე მეტი დროისა და ფინანსების ხარჯვას. პარტიას „საქართველოსთვის“ და მის ლიდერს გიორგი გახარიას ჯერ კიდევ წინასაარჩევნო პროგრამაში ჰქონდა ინიციატივა იმის შესახებ, რომ სატრანსპორტო რეფორმის დასრულებამდე საზოგადოებრივი ტრანსპორტით სარგებლობა ყოფილიყო უფასო, რაც იქნებოდა ერთგვარი კომპენსაცია თბილისელებისთვის შექმნილი დისკომფორტისთვის. დაუშვებლად მიგვაჩნია შექმნილი მდგომარეობის გამართლება მიმდინარე ინფრასტრუქტურული პროექტებით, რაც თავისთავად წარმოადგენს პრიორიტეტს დედაქალაქისთვის, მაგრამ ეს არ უნდა ხდებოდეს ჩვენი მოქალაქეების დისკომფორტის, დახარჯული ენერგიის, ნერვებისა და ფინანსური ზარალის ხარჯზე“ -განაცხადა ფრაქცია „ თბილისი საქართველოსთვის“ თავმჯდომარის მოადგილემ.
