დღეს თბილისის საკრებულოს გენდერული თანასწორობის საბჭოს ინიციატივით, სასტუმრო „ბილტმორში“ სექსუალური შევიწროების პრევენციასა და მასზე რეაგირების მექანიზმთან დაკავშირებით სამუშაო შეხვედრა გაიმართა. შეხვედრას საკრებულოს თავმჯდომარე გიორგი ტყემალაძე, საკრებულოს უმრავლესობისა  და  უმცირესობის წევრები  ესწრებოდნენ.

სამუშაო შეხვედრა  გენდერული თანასწორობის საბჭოს თავმჯდომარემ, თინათინ ნიბლოშვილმა, გახსნა. მან  განაცხადა, რომ  სექსუალური შევიწროების პრევენციისა და მასზე  რეაგირების   მექანიზმებთან  დაკავშირებით  თბილისის საკრებულო და დედაქალაქის  მერია ერთობლივ დოკუმენტს მიიღებს.  მისი თქმით,  სხვადასხვა უწყების შემდეგ თბილისის მუნიციპალიტეტშიც იქნება მიღებული აღნიშნული დოკუმენტი.  გენდერული თანასწორობის საბჭოს თავმჯდომარის თქმით,  საერთაშორისო ორგანიზაციები  გასცემენ რეკომენდაციებს, რომ ყველა თვითმმართველ ორგანოში აღნიშნული დოკუმენტი  მიღებული უნდა იყოს. 

დღესვე თბილისი მერის მრჩეველმა გენდერულ საკითხებში ნინო ბურძენიძემ  შეხვედრაზე სექსუალური შევიწროების  პრევენციის მექანიზმების   დოკუმენტის მიღებისა  და საჩივრის განხილვის მექანიზმთან დაკავშირებით ისაუბრა. იმედი გამოთქვა, რომ საკრებულოს სხდომაზე დეპუტატები დადებით გადაწყვეტილებას მიიღებენ და საკრებულოშიც და მერიაშიც მიღებული იქნება აღნიშნული დოკუმენტი. 

სამუშაო შეხვედრას გაეროს ქალთა ორგანიზაციის პროგრამის ანალიტიკოსი ქეთევან შუბაშვილი უძღვებოდა,  მან დეპუტატებს სამუშაო ადგილზე სექსუალური შევიწროების პრევენციისა და მასზე რეაგირების მექანიზმებთან დაკავშირებით პრეზენტაცია წარუდგინა. როგორც მან აღნიშნა,  საზოგადოებრივ ტრანსპორტში განთავსებულია სპეციალური ვიზუალური გამოსახულებები, რაც მიზნად ისახავს საზოგადოებაში აღნიშნულ საკითხთან დაკავშირებით ცნობიერების ამაღლებას.

შეხვედრა კითხვა-პასუხის რეჟიმში მიმდინარეობდა.