შალვა ოგბაიძე ჯანჯღავას ქუჩაზე წყალმომარაგების სისტემის სარეაბილიტაციო სამუშაოებს გაეცნო

თბილისის საკრებულოს გლდანის (ავჭალის) რაიონის მაჟორიტარმა დეპუტატმა შალვა ოგბაიძემ, ჯანჯღავას ქუჩის I ჩიხში მიმდინარე წყალმომარაგების მაგისტრალური ქსელის სარეაბილიტაციო სამუშაოები დაათვალიერა და მოსახლეობას შეხვდა. 

საკრებულოს წევრთან ერთად, ადგილზე გლდანის რაიონის გამგებელი ბექა მიქაუტაძე და თბილისის წყალმომარაგების კომპანია „ჯივიპი“-ს ოპერაციების მართვის დირექტორის მოადგილე ზურა ალფაიძე იმყოფებოდნენ.

შალვა ოგბაიძის თქმით, მის სამაჟორიტარო რაიონში მდებარე ამ ქუჩაზე  წყალმომარაგების სისტემის განახლების მიზნით მასშტაბური სარეაბილიტაციო პროექტი ხორციელდება.

„საქმის კეთება გრძელდება. მიმდინარე წლის  2 აპრილიდან კომპანია „ჯივიპი“-მ ამ ქუჩაზე, სადაც უგზოობის პრობლემაც იდგა, მასშტაბური პროექტის განხორციელება დაიწყო. ამჟამად სამუშაოები ქუჩის I ჩიხში მიმდინარეობს, მომდევნო ეტაპზე კი კომპანია წყალმომარაგების სისტემის რეაბილიტაციას  ჯანჯღავას ქუჩის II  ჩიხსა და III შესახვევში გააგრძელებს“, - განაცხადა შალვა ოგბაიძემ.

მისივე ინფორმაციით, მთლიანობაში სამუშაოების დასრულებას დაახლოებით ორი თვე დასჭირდება, რის შემდეგაც გლდანის რაიონის გამგეობა აღნიშნულ ქუჩაზე ასფალტის საფარს დააგებს.