თბილისის საკრებულოს სამგორის რაიონის მაჟორიტარი დეპუტატის, რევაზ სოხაძის ინიციატივით, ვარკეთილი 3-ის ტერიტორიაზე კედრის ხეები დაირგო. ღონისძიება კამპანია „გაამწვანე ვარკეთილის“ ფარგლებში გაიმართა. 

„დღეს, კედრის ხეები ვარკეთილი 3-ის, მე-2 მ/რ-ში მდებარე N178-ე საჯარო სკოლის მიმდებარე ტერიტორიაზე დავრგეთ. პროცესში  ამ სკოლის მოსწავლეებმა და საფეხბურთო კლუბის „გრანდ თბილისის“ ბენეფიციარებმა აქტიური მონაწილეობა მიიღეს,“-განაცხადა რევაზ სოხაძემ. 

დღევანდელი აქცია შპს „დომუს დეველოპმენტ“-ის და მის დირექტორის ალექსანდრე კორძახიას ჩართულობით და მხარდაჭერით განხორციელდა. 

ღონისძიების "გაამწვანე ვარკეთილის" მიზანია, რაიონში რეკრეაციული სივრცეების განვითარება და ეკოლოგიური მდგომარეობის გაუმჯობესება. ამ მიმართულებით, მაჟორიტარი დეპუტატის მხარდაჭერით, ვარკეთილი 3-ის ტერიტორიაზე კიდევ არაერთი პროექტი განხორციელდება.