გლდანის რაიონში, მუხიანის მეოთხე ბ მიკრორაიონში N32 ა და N35 ა კორპუსების მიმდებარედ სკვერის რეაბილიტაცია დასრულდა. სკვერის მოწყობის დასრულებული სამუშაოები თბილისის საკრებულოს გლდანის რაიონის (მუხიანი) მაჟორიტარმა დეპუტატმა ამავე რაიონის გამგებელ ბექა მიქაუტაძესთან ერთად დაათვალიერა და ადგილობრივ მოსახლეობას შეხვდა.

სამუშაოების შედეგად, 1 600 კვ. მ ფართობზე მოეწყო ბავშვთა გასართობი სივრცე, თანამედროვე სტანდარტების კალათბურთის მოედანი, სარწყავი სისტემა, განათება და სკვერისთვის საჭირო სხვა ინფრასტრუქტურა. ამასთან, აღნიშნული ტერიტორია გამწვანდა, დაირგო სხვადასხვა ჯიშის ხე-მცენარე. უმოკლეს დროში სკვერთან მისასვლელი გზის მოწესრიგება დაიწყება.

სამუშაოები, გლდანის რაიონის გამგეობის  დაკვეთით, ტენდერში გამარჯვებულმა შპს „პე-ბე“- მ  განახორციელა. გამგეობის ბიუჯეტიდან კი 221 813 ლარი დაიხარჯა.