თბილისის საკრებულოს ინიციატივითა და საქართველოში შვედეთის საელჩოს მხარდაჭერით, ვარკეთილში დღეს გამწვანების აქცია გაიმართა. თაყაიშვილის ქუჩაზე მდებარე სკვერში 133 ძირი კიპარისი დაირგო.  ღონისძიებაში მონაწილეობა თბილისის საკრებულოს თავმჯდომარემ გიორგი ტყემალაძემ, სამგორის რაიონის მაჟორიტარმა, რევაზ სოხაძემ და შვედეთის სამეფოს საგანგებო და სრულუფლებიანმა ელჩმა საქართველოში, ანა ლიბერმა მიიღეს.

თბილისის საკრებულოს თავმჯდომარის გიორგი ტყემალაძის თქმით, გამწვანება ქალაქისთვის პრიორიტეტული მიმართულებაა და გამწვანების სამუშაოები აქტიურად მიმდინარეობს. გიორგი ტყემალაძემ შვედეთის საელჩოს აღნიშნული აქციის მხარდაჭერისთვის მადლობა გადაუხადა.

„ვარკეთილში, დღეს კიდევ ერთი გამწვანების აქცია გაიმართა. დღევანდელი ღონისძიება  შვედეთის საელჩოს მხარდაჭერით ჩატარდა, რისთვისაც   მინდა მათ მადლობა გადავუხადო. გამწვანება არის ჩვენთვის ერთ-ერთი პრიორიტეტული მიმართულება და შეიძლება ითქვას, რომ ქალაქის მასშტაბით ამგვარი ღონისძიებები ტრადიციად იქცა“-განაცხადა გიორგი ტყემალაძემ.  

ქალაქის გამწვანების მნიშვნელობაზე შვედეთის სამეფოს საგანგებო და სრულუფლებიანმა ელჩმა საქართველოში ანა ლიბერმაც ისაუბრა. მისი თქმით, ურბანული განვითარების პირობებში ხე-მცენარეების როლი ძალიან მნიშვნელოვანია.

„მოხარული ვარ, რომ ვიმყოფები დღევანდელ ღონისძიებაზე, რომელიც  ეკოსამიტი 2023-ის ფარგლებშია ორგანიზებული. გამონაბოლქვის წინააღმდეგ ბრძოლაში თითოეული ხე არის ძალიან მნიშვნელოვანი. დღეს ჩვენ 133 ძირი ხე დავრგეთ, შესაბამისად მათი ეფექტი განსაკუთრებული იქნება.   ყველას უნდა გვესმოდეს, თუ რამდენად მნიშვნელოვანია ხე-მცენარეების როლი ურბანული განვითარების პირობებში“-განაცხადა ანა ლიბერმა.

გამწვანების აქცია სამგორის რაიონში კამპანიური ხასიათისაა და იგი მომავალშიც გაგრძელდება.