თბილისში, საბურთალოს რაიონში ცინცაძე-კარტოზიას დამაკავშირებელ სატრანსპორტო კვანძთან თანამედროვე, მულტიფუნქციური სპორტული სივრცე მოეწყო.

ახალი სპორტული სივრცე საბურთალოს მაჟორიტარმა დეპუტატმა დავით უთმელიძემ, რაიონის გამგებელ გაიოზ ვასაძესთან ერთად დაათვალიერა.

როგორც დეპუტატმა აღნიშნა,  სპორტულ ინფრასტრუქტურას, რომელიც   მაღალი ხარისხით გამოირჩევა და  არაერთი სერტიფიკატი აქვს მიღებული,   საქართველოში ამ ეტაპზე  ანალოგი არ გააჩნია.

მულტიფუნქციურ სივრცეში განთავსებული თანამედროვე სპორტული ინვენტარი იძლევა საშუალებას, რომ მოქალაქე ვარჯიშის ინსტრუქციას წერილობით ან QR კოდის მეშვეობით, ვიდეოს სახით გაეცნოს.

გარდა ამისა, ინვენტარს აქვს აპლიკაცია სმარტფონებისთვის, რომლის საშუალებით შესაძლებელი ხდება ვარჯიშების ვიდეოს სახით მომზადება. ეს კი ვარჯიშისა და შესვენებისთვის განკუთვნილ დროს მიუთითებს და ამასთანავე, აჩვენებს, თუ რომელი სავარჯიშო რომელი კუნთის განვითარებას უწყობს ხელს, ასევე, განსაზღვრავს სტატისტიკას, პროგრესს და კვების რეჟიმს.

"აღნიშნული სპორტული სივრცე ჯანსაღი ცხოვრების ხელშეწყობის მიზნით მოეწყო. სასიხარულოა ის ფაქტი, რომ ასეთი სივრცე პირველად სწორედ ჩემს სამაჟორიტარო ოლქში გაკეთდა. კარგი იქნება, თუ მსგავსი სივრცე თბილისის სხვა რაიონებშიც მოეწყობა, რითაც  ჯანსაღი ცხოვრების წესის დანერგვასა და განვითრებას ყველა ერთად შევუწყობთ ხელს", - აღნიშნა დავით უთმელიძემ.