თბილისის მუნიციპალიტეტის საკრებულოს თავმჯდომარე გიორგი ალიბეგაშვილი თავმჯდომარის მოადგილესთან გიორგი ახვლედიანთან და საკრებულოს დეპუტატებთან ერთად საგაზაფხულო გამწვანების აქციას დაესწრო, რომლის ფარგლებშიც დიღმის ტყე-პარკში  600 წიწვოვანი ნერგი დაირგო.

პირველი ნერგი გიორგი ალიბეგაშვილმა თბილისის მერთან დავით ნარმანიასთან, საქართველოს კათოლიკოს-პატრიარქთან ილია მეორესთან და გარემოსა და ბუნებრივი რესურსების დაცვის მინისტრთან გიგლა აგულაშვილთან ერთად დარგო.

აქციაში მონაწილეობა თბილისის მუნიციპალიტეტის საკრებულოს გარემოს დაცვის კომისიის თავმჯდომარემ შორენა ბუხრაშვილმა, ამავე კომისიის წევრებმა- ჯაბა ჯიშკარიანმა და  თარაშ შურღაიამ, ასევე გარემოსა და ბუნებრივი რესურსების დაცვის სამინისტროსა და საპატრიარქოს წარმომადგენლებმა მიიღეს.

საგაზაფხულო გამწვანების პირველ მასშტაბურ აქციაზე დიღმის ტყე-პარკში 7000 კვ. მ ფართობზე 600 კიპარისისა და კედრის ხე-მცენარე დაირგო.
2016 წელს თბილისის მასშტაბით კიდევ  180 000 ნერგის დარგვაა დაგეგმილი. 100 000 ხე-მცენარე კი შემოდგომაზე სეზონური რგვების ფარგლებში დაირგვება.

საგაზაფხულო რგვები მაისის შუა რიცხვებამდე გაგრძელდება. გამწვანების სამუშაოები წინასწარ შერჩეულ ტერიტორიებზე, სპეციალისტების რეკომენდაციებით შემუშავებული გეგმის მიხედვით ტარდება. 
მცენარეების დარგვის შემდეგ მათ შემდგომ მოვლა-პატრონობას კონტრაქტორი კომპანიები უზრუნველყოფენ.