თბილისის საკრებულოს ურბანული დაგეგმარების და საქალაქო მეურნეობის კომისიის თავმჯდომარე, სამგორის რაიონის მაჟორიტარი დეპუტატი რევაზ სოხაძე ვარკეთილი 3-ში,  ოთხ მისამართზე სანიაღვრე ქსელის გაწმენდითი სამუშაოების მიმდინარეობის პროცესს დაესწრო.

რევაზ სოხაძესთან ერთად თაყაიშვილის, ალექსიძის, მებრძოლთა და ვიქტორ კუპრაძის ქუჩებზე,  შპს „თბილსერვის ჯგუფი“-ს დირექტორი ლევან ჯღარკავა, სანიაღვრე და სადრენაჟე ქსელების ექსპლუატაციის სამსახურის უფროსი ნოდარ ზარდიაშვილი და სამგორის რაიონის გამგეობის თანამშრომლები იმყოფებოდნენ.

როგორც სამგორის რაიონის მაჟორიტარმა დეპუტატმა განაცხადა, ვარკეთილი 3-ში სანიაღვრე ქსელის სარეაბილიტაციო სამუშაოების დაწყებაც იგეგმება.

„დღეს    ვარკეთილი 3-ში,  ოთხ მისამართზე ვიმყოფებოდი და ადგილზე გავეცანი სანიაღვრე ქსელის გაწმენდითი სამუშაოების მიმდინარეობას. აღსანიშნავია ისიც, რომ გარდა გაწმენდითი სამუშაოებისა, რაიონში  სანიაღვრე ქსელის  რეაბილიტაციაც იგეგმება“ - განაცხადა რევაზ სოხაძემ.

სანიაღვრე ქსელზე მიმდინარე სამუშაოების პარალელურად,  სამგორის რაიონის მაჟორიტარის ინიციატივით და „თბილსერვის ჯგუფი“-ს მხარდაჭერით, აღნიშნულ მისამართებზე სანაგვე ურნების  მონტაჟიც დაიწყება.