თბილისის მუნიციპალიტეტის საკრებულოს განათლებისა და კულტურის კომისიის თავმჯდომარის თამარ ტალიაშვილის ინიციატივით, საკრებულოში, თბილისის  საბავშვო ბაგა-ბაღებში ვიდეო-მონიტორინგის რეგულაციებთან დაკავშირებით შეხვედრა გაიმართა.

 საკრებულოს თავმჯდომარე გიორგი ალიბეგაშვილი და თამარ ტალიაშვილი საქართველოს პერსონალურ მონაცემთა დაცვის ინსპექტორს, თამარ ქალდანს პირადად შეხვდნენ და აღნიშნული სამსახურის მიერ შემუშავებულ რეგულაციებს გაეცნენ.

 როგორც თამარ ტალიაშვილმა აღნიშნა, მნიშვნელოვანია პერსონალურ მონაცემთა დაცვის ხელშეწყობა, როგორც ცენტრალურ, ასევე ადგილობრივ დონეზე, განსაკუთრებით კი, იმ პირობებში, როდესაც საქმე ეხება საბავშვო ბაღებს და მათ აღსაზრედელებსა თუ აღმზრდელებს.

 “თბილისის საბავშვო ბაღებში წლების მანძილზე აქტიურად მიმდინარეობდა ვიდეო მონიტორინგის დანერგვა. ჩვენ მიგვაჩნია, რომ აუცილებელია ამ პროცესის შესაბამისობაში მოყვანა პერსონალურ მონაცემთა დაცვის პრინციპებთან. ეს მნიშვნელოვანია როგორც ჩვენი აღსაზრდელებისა და მათი მშობლებისათვის, ისე ბაღის აღმზრდელების უფლებების დაცვისათვის. იმისთვის რომ საუკეთესო პრაქტიკა დავნერგოთ რეკომენდაციებისთვის მივმართეთ საქართველოს პერსონალურ მონაცემთა დაცვის ინსპექტორს ”, - აღნიშნა თამარ ტალიაშვილმა. 

როგორც თამარ ქალდანმა შეხვედრაზე განმარტა, აუცილებელია თითოეულმა მათგანმა იცოდეს სად და როგორ განხორციელდება ვიდეო თვალთვალი და ვისთვის იქნება მასალა ხელმისაწვდომი. შეხვედრაზე მხარეებმა აღნიშნეს, რომ რეგულაციების შემუშავების შემდგომ აუცილებელია საბავშვო ბაგა-ბაღების პერსონალისთვის ჩატარდეს შესაბამისი ტრენინგები. 

შეხვედრისას, ასევე გაჩნდა ინიციატივა, ბაგა-ბაღებში რეგისტრაციის პროცესისას დამუშავებული პერსონალური მონაცემების გამოყენების რეგულირების შესახებ. 

გარდა ამისა, საუბარი შეეხო თბილისის საკრებულოსა და მერიის სამომავლო აქტიური თანამშრომლობას საქართველოს პერსონალურ მონაცემთა დაცვის აპარატთან. 

შეხვედრა ერთ საათზე მეტ ხანს გაგრძელდა და მას დედაქალაქის მერიის იურიდიული სამსახურის უფროსი გურანდა რუმანაძე და ბაღების სააგენტოს უფროსის მოადგილე ესწრებოდნენ.