თბილისის საკრებულოში ჯანმრთელობის დაცვის და სოციალურ საკითხთა კომისიის სხდომა გაიმართა, რომელსაც კომისიის თავმჯდომარე ბექა მიქაუტაძე უძღვებოდა. 

სხდომაზე თბილისის მუნიციპალიტეტის 2026 წლის ბიუჯეტის დამტკიცების შესახებ საკრებულოს 2025 წლის 23 დეკემბრის N5-8 დადგენილებაში ცვლილების შეტანის შესახებ იმსჯელეს. საკითხი კომისიის წევრებს თბილისის მერიის საფინანსო საქალაქო სამსახურის უფროსმა გაიოზ თალაკვაძემ წარუდგინა. 

ცვლილებები ხორციელდება 2026 წლის 1 იანვრისათვის თბილისის   ბიუჯეტის ანგარიშებზე არსებული ნაშთების ნაწილის 273 860,1 ათასი ლარის (მათ შორის დელეგირებული უფლებამოსილების ფარგლებში 2025 წელს ბიუჯეტის ანგარიშზე ჩარიცხული ნაშთი - 2 095,6 ათასი ლარი) გამოყენების და მიმდინარე წელს მოსალოდნელი პროგნოზების გათვალისწინებით. 

წარმოდგენილი პროექტით ბიუჯეტის მოცულობა იზრდება 296 420,1 ათასი ლარით და  2 506 978,3 ათას ლარს შეადგენს. 

პროექტში ასევე გათვალისწინებულია თბილისის მერიის სტრუქტურული ერთეულების, რაიონის გამგეობების და სხვა საბიუჯეტო ორგანიზაციების წინადადებები დამატებითი მოთხოვნების და გადანაწილების შესახებ. 

აღნიშნულის გათვალისწინებით ასიგნებები გადანაწილდა სხვადასხვა პროგრამებზე/ ქვეპროგრამებზე, მათ შორის, ჯანმრთელობის დაცვის და სოციალური მიმართულებით იზრდება: დაავადებათა სკრინინგის დაფინანსება – 3 მილიონი ლარით, რომელიც ითვალისწინებს ფილტვის კიბოს სკრინინგს, შეზღუდული შესაძლებლობის მქონე ბავშვთა და მოზარდთა საკურორტო მომსახურება – 385  ათასი ლარით, უფასო სწავლება მოსწავლე ახალგაზრდობის სახლებში და სასახლეში – 190,5 ათასი ლარით, უფასო სწავლება ხელოვნების სკოლებში – 294  ათასი ლარით, უფასო სწავლება სპორტულ სკოლებში და საცურაო აუზებში – 241,7 ათასი ლარით, სოციალური მზრუნველობის სააგენტოს ხელშეწყობა – 821,1 ათასი ლარით, სამედიცინო და სხვა სოციალური საჭიროებების დახმარების ღონისძიებები – 2 000  ლარით, თბილისის მუნიციპალური თავშესაფრის მოვლა-პატრონობა – 915,4 ათასი ლარით. 

ჯანმრთელობის დაცვის და სოციალურ საკითხთა კომისიის სხდომაზე წარმოდგენილ საკითხს, საკრებულოს უახლოეს სხდომაზე განსახილველად დადებითი რეკომენდაცია მიეცა.