თბილისის საკრებულოს თავმჯდომარის მოადგილე თინათინ ნიბლოშვილი, ისანი 2 (ვაზისუბანი) მაჟორიტართან, ბექა მენთეშავილთან, ასევე  საკრებულოსთან არსებული ეროვნული უმცირესობების საკოორდინაციო საბჭოს თავმჯდომარესთან,  რიტა ხიდირბეგიშვილთან ერთად დედაქალაქის N121 ბაგა-ბაღში ეზიდური საკვირაო ბაღს ესტუმრა და ეზიდ ბავშვთა კონცერტს დაესწრო.

თბილისის N121  ბაგა-ბაღი ერთადერთია დედაქალაქში, სადაც ეზიდური ჯგუფი ფუნქციონირებს და რომელიც დედაქალაქის საკრებულოს ინიციატივითა და თბილისის მერიის მხარდაჭერით გაიხსნა. ამ ჯგუფში ეზიდი ბავშვები სხვა სავალდებულო დისციპლინებთან ერთად, მშობლიურ ენასაც ეუფლებიან.

შეხვედრა ააიპ ქალთა უფლებების სათემო ინიციატივის პროექტის დირექტორმა გახსნა. 

როგორც ლილი საფაროვამ აღნიშნა, დღევანდელი დღე კულტურის სამინისტროსა და ორგანიზაციის - ,,შემოქმედებითი საქართველო'' ერთობლივი პროექტის, სახელწოდებით-,,ეზიდური საგანმანათლებლო შემოქმედებითი საქმიანობის განვითარება’’ პრეზენტაციას ეძღვნება.

,,ეს არის პირველი ძალიან მნიშვნელოვანი პროექტი, რომელიც თბილისში მცხოვრები ეზიდი ბავშვებისთვის ეზიდური ენის შესწავლა-შენარჩუნებას ითვალისწინებს,“-განაცხადა ლილი საფაროვამ. 

„მინდა, მოგილოცოთ დღევანდელი დღე. ძალიან მნიშვნელოვანია ეზიდური ენის შენარჩუნება თბილისში მცხოვრები ეზიდებისთვის. სწორედ ამას ემსახურება ეზიდური ჯგუფის გახსნა N121  ბაგა-ბაღში, სადაც დაახლოებით 15 ეზიდი ბავშვი ეუფლება მშობლიურ ენას. ამ პროექტის მხარდაჭერა მომავალშიც გაგრძელდება"- განაცხადა თინათინ ნიბლოშვილმა.

ღონისძიების ფარგლებში ასევე მოეწყო სახვითი ხელოვნების ნამუშევრების და ხელნაკეთი სამკაულების გამოფენა, ხოლო ორგანიზაციის - ,,შემოქმედებითი საქართველო'' წარმომადგენელმა ბავშვებს სამახსოვრო საჩუქრები გადასცა.