საქართველოს პრეზიდენტი მიხეილ ყაველაშვილი პარლამენტის წინაშე წლიური მოხსენებით წარდგა. პრეზიდენტის მოხსენებას თბილისის საკრებულოს თავმჯდომარის პირველი მოადგილე ბექა დავითულიანი დაესწრო.

სიტყვით გამოსვლისას მიხეილ ყაველაშვილმა ყურადღება ბოლო პერიოდში გამართულ მაღალი დონის შეხვედრებზე  გაამახვილა. საქართველოს პრეზიდენტმა ქვეყნის მიღწევებსა და არსებულ გამოწვევებზეც ისაუბრა. მან ასევე ხაზი გაუსვა მშვიდობის მნიშვნელობას, რის გარეშეც ქვეყნის წინსვლა და განვითარება შეუძლებელია.  როგორც მიხეილ ყაველაშვილმა აღნიშნა, დღეს, სახელმწიფო მტკიცედ იცავს საქართველოს სუვერენიტეტს, ეროვნულ ინტერესებსა და იმ ფუნდამენტურ ღირებულებებს, რომლებიც სახელმწიფოებრიობის არსს განსაზღვრავს.

საქართველოს პრეზიდენტის განცხადებით, გრძელვადიანი განვითარებისთვის აუცილებელია, რომ მომავალი თაობებისთვის ამოსავალი წერტილი იყოს სამშობლოს სიყვარული, სუვერენიტეტისა და დამოუკიდებლობის გაფრთხილება, ოჯახური ღირებულებებისა და ტრადიციების პატივისცემა.

ამ და სხვა თემებზე საუბრის შემდეგ, პარლამენტის ფრაქციების თავმჯდომარეებმა პრეზიდენტს კითხვები დაუსვეს, რის შემდეგაც მიხეილ ყაველაშვილი დასკვნითი სიტყვით გამოვიდა. 

პრეზიდენტის მოხსენებას პარლამენტში მთავრობის წევრები ესწრებოდნენ.