დღეს თბილისის საკრებულოს სახელდებისა და სიმბოლიკის კომისიის სხდომა და  დაინტერესებული მოქალაქეების მონაწილეობით, წარმოდგენილი საკითხების საჯარო განხილვა გაიმართა. როგორც კომისიის თავმჯდომარემ თინათინ ნიბლოშვილმა აღნიშნა, საკითხების საჯარო განხილვები დაინტერესებული მხარეების მოსაზრებების გაცნობისთვის ძალიან მნიშვნელოვანია. მისივე ინფორმაციით, დღევანდელ სხდომაზე ისეთი საკითხებია წარმოდგენილი, როგორიცაა საბურთალოს რაიონში, თბილისის ზოოლოგიური პარკის მიმდებარედ, ისტორიულად ჩამოყალიბებული უბნისთვის ხილიანის სახელის მინიჭება, ასევე საქართველოს ტერიტორიული მთლიანობისთვის დაღუპული მებრძოლების სახელების უკვდავყოფა.

სახელდების და სიმბოლიკის კომისიამ ნაძალადევის რაიონში მდებარე უსახელო სკვერისთვის აფხაზეთის საომარი მოქმედებების დროს დაღუპული ძმები წიკლაურების სახელის მინიჭების შესახებ, ასევე ვაკის რაიონში, წყნეთში არსებული უსახელო სკვერისთვის აფხაზეთის საომარი მოქმედებების დროს დაღუპული მიხეილ ოძელაშვილის სახელის მინიჭებას მხარი დაუჭირა. სამგორის რაიონის მდებარე ერთ-ერთ ქუჩას, რუსეთ-საქართველოს ომში დაღუპული კაპრალის, ვახტანგ გზირიშვილის და მისი მამის, აფხაზეთის საომარი მოქმედებების დროს დაღუპული მებრძოლის ბადრი გზირიშვილის სახელი დაერქმევა. ამ საკითხების განხილვაში დაღუპულთა ოჯახის წევრები და ვეტერანების საქმეთა სახელმწიფო სამსახურის წარმომადგენლები ესწრებოდნენ.

კომისიის თავმჯდომარის თინათინ ნიბლოშვილის განცხადებით,  სახელდების და სიმბოლიკის კომისია ისტორიული სახელების და ტოპონიმების გაცოცხლებასა და შენარჩუნებაზე აქტიურად მუშაობს. ისტორიული წყაროების მიხედვით, დღევანდელი ჩიქოვანის ქუჩის მიდამოები ხილიანის უბნის სახელით მოიხსენიებოდა და უბანს ეს სახელწოდება დაუბრუნდება.  

სახელდების და სიმბოლიკის კომისიამ იმსჯელა ასევე თბილისის რამდენიმე ქუჩისთვის ცნობილი მხატვრების, მწერლების და საზოგადო მოღვაწეების სახელების მინიჭების შესახებ.